दौंड : पोदार इंटरनॅशनल स्कूल, दौंड येथे ख्रिसमस सण मोठ्या उत्साहात, आनंदी व भक्तीमय वातावरणात साजरा करण्यात आला. विद्यार्थ्यांमध्ये प्रेम, शांतता, आपुलकी, दानशीलता आणि एकोप्याची भावना रुजवणे हा या कार्यक्रमाचा मुख्य उद्देश होता. या प्रसंगी कार्यक्रमाला प्रमुख पाहुणे म्हणून श्री. बेंजामिन तिवारी सर यांची विशेष उपस्थिती लाभली. कार्यक्रमाचे आयोजन व मार्गदर्शन आदरणीय प्राचार्या सौ. स्वाती कणसे मॅडम यांच्या कुशल नेतृत्वाखाली करण्यात आले.
कार्यक्रमाची सुरुवात प्रार्थनेने झाली. त्यानंतर प्रमुख पाहुण्यांचे पुष्पगुच्छ देऊन स्वागत करण्यात आले. शाळेचा संपूर्ण परिसर ख्रिसमस ट्री, तारे, घंटा, आकर्षक रोषणाई आणि सांताक्लॉजच्या सजावटीने अत्यंत मनमोहक व आनंदी वातावरणात नटलेला होता. विद्यार्थ्यांनी ख्रिसमस कॅरोल्स, समूह नृत्य, नाटिका तसेच भाषणांच्या माध्यमातून प्रभू येशू ख्रिस्तांच्या जन्माचा संदेश प्रभावीपणे सादर केला. त्यांच्या सादरीकरणातून सर्जनशीलता, आत्मविश्वास आणि संघभावना स्पष्टपणे दिसून आली.प्रमुख पाहुणे श्री. बेंजामिन तिवारी सर यांनी आपल्या मनोगतात विद्यार्थ्यांच्या सादरीकरणाचे कौतुक केले. दयाळूपणा, प्रामाणिकपणा व परस्पर आदर ही मूल्ये आत्मसात करण्याचे आवाहन त्यांनी केले. तसेच शिक्षकवृंद व शाळा व्यवस्थापनाच्या प्रयत्नांचे त्यांनी विशेष कौतुक केले.
यावेळी प्राचार्या सौ. स्वाती कणसे मॅडम यांनी विद्यार्थ्यांना मार्गदर्शन करताना विविध सण साजरे करण्यामागील सामाजिक व सांस्कृतिक महत्त्व स्पष्ट केले. अशा उपक्रमांमुळे विद्यार्थ्यांमध्ये सामाजिक सलोखा, सांस्कृतिक जाणीव व एकात्मता निर्माण होते, असे त्यांनी नमूद केले.
या कार्यक्रमात उपप्राचार्या सौ. नीलम अग्रवाल मॅडम, प्रशासकीय प्रमुख श्री. नितीन करे, शिशुविभाग प्रमुख सौ. शकुंतला तोरस्कार तसेच कार्यक्रम संयोजक श्री. अतुल मोरे हे उपस्थित होते. कार्यक्रमाचा समारोप आभार प्रदर्शनाने करण्यात आला. उपस्थित सर्वांना मिठाईचे वाटप करण्यात आले. हा ख्रिसमस उत्सव विद्यार्थ्यांसाठी आनंददायी, प्रेरणादायी आणि अविस्मरणीय ठरला.
